काठमाडौं । विद्युतबाट करेन्ट लाग्ने घटनाहरू नेपालमा प्रत्येक वर्ष दर्जनौंको संख्यामा हुने गरेका छन्। यस्ता घटनामा धेरैजसो समयमा तत्काल सहि कदम नचाले ज्यान नै जाने खतरा हुन्छ। यस्तै दुर्घटनाबाट बच्न विशेषज्ञहरूले करेन्ट लागेपछि गर्नुपर्ने प्राथमिक उपायबारे जानकारी दिएका छन्।
विद्युत् सुरक्षा विज्ञ इन्जिनियर रोशन खनालका अनुसार करेन्ट लाग्नेबित्तिकै सबैभन्दा पहिले करेन्ट दिने स्रोत हटाउने प्रयास गर्नुपर्छ। “विद्युत आपूर्ति बन्द गर्नुस्, वा प्रभावित व्यक्तिलाई सुरक्षित तरिकाले करेन्टबाट अलग गर्नुपर्छ,” उनले बताए। यसका लागि रबर, काठ वा प्लास्टिकका वस्तुको प्रयोग गर्न सुझाव दिइन्छ।
करेन्ट लागेका व्यक्तिलाई नछोइ पहिले सुरक्षाको ख्याल गर्नु जरूरी छ। नत्र जोगाउन खोज्ने मानिसलाई समेत करेन्ट लाग्न सक्छ। करेन्ट हटाएपछि व्यक्ति होशमा छ कि छैन भन्ने चेक गर्नुपर्छ – सास चलिरहेको छ वा छैन, मुटु धड्कीरहेको छ कि छैन जाँच गर्नु आवश्यक हुन्छ।
यदि व्यक्ति अचेत छन् भने तुरुन्त CPR (छाती दबाउने र सास दिने प्रक्रिया) सुरू गर्नुपर्छ र एम्बुलेन्स वा नजिकको अस्पतालमा खबर गर्नुपर्छ। जलेको छालामा पानी हालेर चिसो पार्ने र बाँध्ने काम पनि आवश्यक छ
विशेषज्ञहरू भन्छन्, “कुनै पनि करेन्टको घटना गम्भीर हुन सक्छ, त्यसैले सामान्य लागे पनि तुरुन्त चिकित्सकको जाँच आवश्यक हुन्छ।”
नेपाल विद्युत प्राधिकरणका अनुसार, असावधानी, पुराना तार, चोर विद्युत जडान, र ओभरलोडका कारण करेन्ट लाग्ने घटनाहरू बढेका छन्। जनचेतना, समयमै मर्मत, र प्राथमिक उपचारको ज्ञानले यस्ता घटनाबाट ज्यान बचाउन सकिन्छ।
