काठमाडाैं । नेपाल आयल निगमले आज राती १२ बजेबाट लागू हुने गरी पेट्रोल, डिजेल, मट्टीतेल र हवाइ इन्धनको मूल्य बढाएको छ । निगमले आज एक विज्ञप्ति जारी गर्दै पेट्रोल प्रति लिटरमा २ रुपैयाँ र डिजेल तथा मट्टीतेल प्रतिलिटरमा ९ रुपैयाँ र हवाइ इन्धन आन्तरिकमा पाँच रुपैयाँले बढाउने निर्णय गरेको हो ।
नयाँ मूल्यसँगै अब पेट्रोल प्रति लिटर १ सय ८१, डिजेल र मट्टीतेल प्रति लिटर १ सय ७२ रुपैयाँ पर्नेछ भने हवाइ इन्धन आन्तरिकको मूल्य १ सय ९० रुपैयाँ लिटर पर्ने छ । खाना पकाउने एलपी ग्यासको मूल्य भने यथावत राखिएको छ ।
यसअघि असार ११ गते मात्र निगमले पेट्रोलमा २० र डिजेल र मट्टीतेलमा २९ रुपैयाँ घटाएको थियो ।
निगमका अनुसार भारतीय आयल कर्पोरेसनले पठाएको नयाँ मूल्यका आधारमा भाउ बढाउनु परेको हाे ।
आयल निगमले अन्तर्राष्ट्रिय बजारबाट आफैं कच्चा तेल खरिद नगर्ने भएकाले भारतीय आयल कर्पोरेसन (आइओसी) बाट आफूलाई चाहिने सबै किसिमका प्रशोधित पेट्रोलियम पदार्थ खरिद गर्दै आएको छ । यसरी पेट्रोलियम किने बापत् आइओसीले हरेक महिना पन्ध्र-पन्ध्र दिनमा आयल निगमलाई मूल्य पठाउने गर्दछ ।
